Haich

tanhaee, yadain, khamoshi
kal shab mujh say milnay aae
taron nay shamaen kee roshan
badal chalkay saghar lae
purva nay sargam ko chera
barkha nay ghungroo chankae
nache phir ik doojay kay sang
main aur teray gham ke sae

anjane main jane wale
jane yeh kia kar jate hain
mar kay bhi kuch jeetay rehtay
jeetay jee kuch mar jate hain
saree aankhain, saray chehray
jane kis kee hain parchaee
saree raheen, saray rastay
jane kis dar par jate hain

-raffay.

:'-)

mat ro bacchay
ammi, abba, baji, bhai
chand aur sooraj
too gar roay ga to yeh sab
aur bhee tujh ko rulwain gay
too muskay ga to shayad
saray ik din bhais badal kar
tujh say khailnay lot aen gay

-faiz

ramblings

deewangee, ka mujib hai kia?
aawargee, ko ghar mil gaya
dooree meray, aas paas thee
anjan wo, mehram tha mera
behka naheen, tha main behkaya gaya
deta raha dhoka bazeegar khola

dhoonda bara, par milnay ka hai dar
gar mil gaya, kho jae na kaheen
anhonee ko, hai honay kee fikar
jo na hooa, ho jae na kaheen
chahta hoon main kay main chahta hoon jisay
chahe jo ho mujh ko, wo chahay naheen

jhoota hai yeh, sacha wo bhi naheen

mulla koee hai munkar hai koee

zahir hai yeh, hai zahir kuch naheen

nazir hai jo, hai manzar bhee wohee

piasay ko hai bus peenay say gharaz

zam zam naheen, maikhana hee sahee

-raffay.

Asif mama kay naam

bisat-e-bada-o-meena uthalo
barha do sham-e-mehfil bazm walo
peeo ab aik jaam-e-alwadaee
peeo aur pee kay saghar tor dalo

-faiz.

terms of endearment

music: lisa hannigan - lille

jaan-e-manam, mon amour, aashikam
naaz-e-chaman, ma cheri, dil baram
hoor-e-iram, sahira, gul badan
sheereen sukhan, ronaq-e-anjuman
jaam-e-ma-e-bay khudi ta adam
saman-e-hosh-o-khirad, sad anam

-raffay.

salam ae jahan!

mood: mostly positive
music: none

khushi ho ya gham
donon yaar hain apne
ik roothay to dooja dil
behlane ko aata hai

rahain kathin
to yeh hain baree laikin
jeenay ka hunar koee
jeenay say hee pata hai

salam raton ki chandi
salam subh ka sona
badal ka kabhi hansna
barish ka yunheen rona

salam phoolon ki mehndi
salam kantoon ka gehna
ambar ka dhanak rangna
dharti ka lahoo behna

salam ae jahan!

chale jo koee
har rasta bane manzil
dheko ghor say dheko
andhera ujala hai

bichray to hain
bhoolay hain naheen laikin
jan anjan har chehra
apnon ka hawala hai

salam lamhon ki sadyan
sadyon kay sabhi lamhay
aankhon say kahee baten
sanson main sunay jumlay

salam khwabon kay gulshun
sehra saray hasrat kay
jeenay marnay kay waday
dilkush dilruba dhokay

salam ae jahan!

-raffay

before the sunrise

mood: calm, hopeful
music: none

aaj har moj-e-hawa say hai sawali khalqat
la koee naghmah, koee sot, teree umr daraz
noha-e-gham hee sahee, shor-e-shadat hee sahee
soor-e-mehshar hee sahee, bang-e-kayamat hee sahee

-faiz.